چمشانک : یاسرکریم
چراگ ٹِمبگ ءَ اِنت
اے دمان ءَ من آزمانکی دپترے ءِ سرا دو دانک نبشتہ کنگ ءَ آں بندات ءَ بگر داں مرچی بلوچی لبزانک ءَ 87 آزمانکی دپتر چاپ بوتگ اے 87 ئیں آزمانکی دپتر 57 آزمانک نویسانی اَنت۔
ھمے آزمانک نویسانی ءُ دپترانی تہ ءَ یکے انام رزا ءِ دپتر ” چراگ ٹِمبگ ءَ اِنت ” انت
” چراگ ٹِمبگ اِنت ” 175 تاکدیم اِنت سرتاک دو چابی اَنت کہ لونجان اَنت ءُ یک چراگے بلے چراگ ٹِمبگ ءَ نہ اِنت ءُ روک انت ءُ رژن ئِے باز اِنت۔ تاکدیم 2 ءَ کتاب ءِ نام، آزمانکارءِ نام، سرتاک جوڑ کنوک ءِ نام کہ زبیر مختار ءَ جوڑ کتگ گالسنج آزمانکارءِ جندءَ کتگ بنگیجی چاپ ستمبر 2018 ، چاپکار ءُ شنگار کوہ ڈگار لبزانکی مجلس، نھاد 150 ءُ دانگ 500 ۔
تاکدیم 3 ءَ نامدات مکھیں مات ءِ نام ءَ کہ آئی ءِ گنگیں زبان ءَ را گویاکی ءِ توان بکشاتگ ۔
تاکدیم 5 ءُ 6 لڑ اِنت
تاکدیم 7 ءَ ایم شکاری ءِ ” سر دانک ” اِنت کہ ایم شکاری انام ءِ دپترے سرءَ کمے گپ کنت ءُ گڈسرءَ گوں راج ءَ دستبدی کنت کہ ” بلوچی لبزانک ءَ ردانک ءِ سرجمیں تک ءُ پھناتانی کَنڈ ءُ بیٹ ھالیگ اَنت ءُ من ھمے سرپد باں کہ رم ءُ ردانک ءِ سک باز زلورت ھست ءُ اے پِڈ ءَ سک باز جھد ءُ کار کنگ لوٹ ایت، امیت اِنت کہ اے کَنڈ ءَ ھورکی ءَ نیل اَنت “۔
تاکدیم 9 ءَ اسگر زھیر ءِ ” چراگ ٹِمبگ ءَ نہ بیت ” اِنت کہ زھیر انام ءِ بازیں آزمانکانی سرءَ وتی ھیالاں نبشتہ کنت ءُ گڈسر ءَ نبشتہ کنت ” انام رزا ءِ آزمانک نبشتہ کنگ ءِ سِنچ ءُ بودناکی سک توانا اِنت، آ وانگ کرز اِیت۔ آئی ءِ آزمانکی سپر ءِ دیم ءَ آیوکیں کِشک ساپ ءُ پلگار اِنت۔ اے کتاب ءِ چاپ بوگ ءَ پد، من جزماں کہ آئی ءِ چراگ ٹِمبگ ءَ نہ بیت، بلکیں مجاں اوں روژنائی ءِ گوھراں شانگ ءَ بیت “۔
تاکدیم 19 ءَ نزر دوست ءِ ” دو دانک پہ تو ” انت نزر دوست انام ءِ بلوچی زبان ءِ دوست دارگ ءِ یک مسالے دنت کہ انام درملک ءَ دگرانی گلام اِنت بلے انگت پہ بلوچی ءَ وھد کشیت ءُ آزمانک نبشتہ کنت۔
تاکدیم 20 ءَ انام رزا ءِ جندءِ ” منی آبریشمیں وابانی کسّہ ” انت کہ انام آزمانک ءِ سرءَ کمے گپ کنت۔ تاکدیم 21 ءَ انام نبشتہ کنت کہ ” آزمانک نبیسی چہ لچہ کاری ءَ گِران تریں کارے ” بلے انگت ھمے گِرانیں کار انام ءَ پہ وت دوست کتگ۔ ھمے تاکدیم 21 ءَ کمے جھل انام موپاسا ءِ نپسیاتی آزمانک ءِ گپ ءَ کنت کہ موپاسا وھدے کارست گنوک ءَ زاھر کنت گڑا آ بازیں ءُ وڑ وڑیں نپسیاتی دپتر وانیت کہ آئی ءِ جند ءِ دماگانی سرءَ اسر کپیت ءُ گڈی ءَ گنوک بیت ءُ بیران بیت ۔
تاکدیم 23 ءَ انام ءِ اولی آزمانک بندات بیت ءُ تاکدیم 170 ءَ گڈی آزمانک کہ تاکدیم 175 ءَ ھلاس بیت۔
تاکدیم 23 ءَ اولی آزمانک ” انما الا عمال بالنیات ” ” چندے تبلیگ والا اَنت کہ وکت جنگ ءَ روگ ءَ اَنت نبیؐ والا کار ءَ کنگ ءَ اَنت۔ بلے چُش نہ انت ادءَ بس دین اسلام ءِ نام زاھر انت ۔
ساتیانی سپر برجاہ انت ءُ یک اسٹیشنے ءَ یک وار ءُ بزگیں زالبولے گوں وتی 6 سالی چُک ءَ سوار بیت جاگہ نہ بیت آ بیچارگ گلی ءِ تھا ھمے تبلیگ والا ملایانی نزیک ءَ نندیت ھمے گونڈو ءِ تبیئت ھم ناجوڑ اَت دم پہ سھت شانگ ءَ اَت۔
تبلیگ والا ورگ ءَ اَنت ھمے گونڈو روک روک ءَ ھمیشاں چارگ ءَ اَت۔ ھمے تبلیگ والاھاں چہ یکے گوشیت کہ من گونڈو ءَ ءُ مات ءَورگ دیاں بلے امیر اجازت نہ دنت ئے کہ مارا اجازت نیست چیاکہ تبلیگ والا انچیں جاگھاں ورگ دیگ بوتگ اَنت ورگانی ءُ آپانی تھا زھر ءُ بے ھوشی گولی مان کنگ بوتگ ءُ انچیں جاھاں مئے تبلیگ والاھاں کسے ءَ را ورگ داتگ ءُ ورگ اِش وارتگ اَنت گڑا ھماھاں وت ءَ بیمار کتگ شانتگ کہ تبلیگ والا بدنام بہ بنت امیر ءَ وت ءَ گیشینت ءُ گُشت”۔
گپ اجازت ءِ نہ انت در اسل ءَ گپ گلامی اِنت کہ اے دین ءِ کار ءَ نہ انت پہ دگر ءَ کار ءَ انت دین اسلام ءِ مردم آجو انت آیاں پابندی پِر نیست ۔
آزمانک ءِ گڈی ءَ ھمے بروتی ئیں چرسی کہ ملایانی نزیک ءَ نشتگ ءُ چرس کشگ ءَ اَت کہ ھمے ساتی کہ گونڈو ءُ مات ءِ کمک ءَ اجازت نہ رست ایت ئے ھمیشی ءَ بڈے ھبر داتگ اَت کہ ادءَ چرس مہ کش کہ آدگہ مردمانی ھیال ءَ بہ کن گڑا ھمے بروتی ئیں چرسی ءَ گونڈو کُٹ ءَ اَت ءُ آپ جتگیں چادرے سرءَ پِر داتگ اَت ۔
ھمے چرسی کہ نشہ کنوکے اَت بلے آزات اَت۔
انام کارستانی کار بندگ ءِ رپک ءَ بلد اَت پہ در ور تاکدیم 35 آزمانک ” سُکسُک ءُ ھلوت ” ءُ تاکدیم 54 ءَ آزمانک ” واھشانی پُرس ” ءِ کارست جوانیں وڑے ءَ کار بستگ اَنت۔
تاکدیم 45 ءَ آزمانک ” تھاریں کوٹیانی باھوٹ ” ماسٹر مراد بکش کہ ھپت سال ات تھاریں زندان ءِ تھاریں کوٹیانی باھوٹ اَت کہ یک روچے روتاکی ٹُکرے ءِ تہ ءَ آئی ءِ سبارگ پتاتگ اَت ءُ آئی ءِ دیم ءَ ایر کنگ بوت ورگ ءِ ورگ ءَ گوں آئی ءِ چم ھمے روتاک ءِ ٹکر ءِ سرءَ یک اکسے ءَ کپ اَنت کہ اکس ءِ چیر ءَ آئی ءِ جنک ءِ مرگ ءِ ھال اَت کہ ملک ءِ انساپ جاہ ءِ دیم ءَ انساپ نہ رسگ ءِ سبب ءَ پِت ءِ بیگوائی ءِ ھپتمی سال ءَ وت ءَ ھمودءَ پاھو دنت۔ اے آزمانک انوگیں جاورانی بابت ءَ اِنت۔
بکول نزر دوست ءِ انام ءِ گیشتر آزمانک بیانیہ ءِ تہ ءَ اَنت۔
آزمانک۔ انما الا عمال بالنیات، گڈی ایس ایم ایس، سُکسُک ءُ ھلوت، مبارکیں مرگ، دِگری، تھاریں کوٹیانی باھوٹ، آشنائیں ھار، واھشانی پُرس، ھانوادگ، داریں سر، چراگ ٹِمبگ ءَ انت، نگرہ ءِ مندریک، جنینو، گوھر، آشنا، زھریچک، درست وتی درور ور انت۔
انام ءِ آزمانک وانگ ءِ وھد ءَ وانوک ءَ بور نہ کن اَنت پرچا کہ انام ءِ زبان سک وش اِنت۔
انام ءِ سرجمیں دپتر سید ءِ رھبند ءَ اِنت۔
انام ءِ درائیں آزمانکانی سرءَ گپ کنگ ءَ بازیں تاکے سیاہ کنگ لوٹ اِیت کہ یک کتابے وت جوڑ بیت پیمشکا من چہ ھمدءَ وتی کلم ءَ داراں ۔
ھر دپترے کہ من ءَ دوست بیت من آئی ءِ سرءَ دو دانک الم نبشتہ کناں ۔
