36

شال : پوسٹ گریجویٹ گرلز ڈگری کالج جناح ٹائون ءِ استاد ءُ نودربرانی یک ٹولی ئے ءَ بلوچی اکیڈمی ءِ کمپلکس ءِ ترّ ءُ تاب کتگ۔

کوئٹہ(گدروشیاپوائنٹ)پوسٹ گریجویٹ گرلز ڈگری کالج جناح ٹائون ءِ استاد ءُ نودربرانی یک ٹولی ئے ءَ بلوچی اکیڈمی ءِ کمپلکس ءِ ترّ ءُ تاب کتگ۔ بلوچی اکیڈمی ءِ کماش سنگت رفیق ءَ آہان ءَ وش اَتک کتگ ءُ بلوچی اکیڈمی ءِ کارانی باروا سرپدی داتگ۔ نودربرانی دیوان ءَ کماش سنگت رفیق ءَ تران کتگ ءُ گوشتگ کہ ماں اسکول ءُ کالجاں ماتی زباناں وانینگ نہ بوئگ ءِ سبب ءَ نودربر وتی زبان، ثقافت ءُ تاریخ ءِ باروا سرپد نہ انت۔ کماش ءَ گوشت کہ بایدیں نودربر وتی نصابی کتابانی وانگ ءَ ہوار لبزانکی ءُ تاریخی سرحالانی باروا ہم بہ وان انت۔ بلوچی ءُ براہوئی زبانانی نبشتہ کارانی کتابانی وانگ ءَ آ وتی زبان ءُ دود ءُ ربیدگ ءِ باروا سرپد بنت۔ کماش سنگت رفیق ءَ گوشت کہ لبزانک انسان ءِ حیال ءُ جذباتانی مارِشت ءِ وسیلہ انت ءُ لبزانک ہرچ علم ءِ سرچمّگ انت۔ اکیڈمی ءِ نائب کماش ہیبتان عمر ءَ بلوچی اکیڈمی ءِ پجّار ءُ کارانی باروا سرپدی دات۔ ڈگری کالج جناح ٹائون ءِ استاد لیکچرار زینب النساء ءَ تران کت ءُ گوشت کہ مئے نودربرانی واہگ بوتگ کہ آ لبزانکی ادارہ ءُ لبزانتاں گند ءُ نند بہ کن انت۔ بانُک زینب النساءَ گوشت کہ پہ لبزانک ءُ زبان ءَ بلوچی اکیڈمی ءِ کرد ستا کر زانت ءُ من اکیڈمی ءِ بازیں دیواناں بہر زرتگ ءُ اودا من ءَ بازیں سرپدی رسیتگ، پمیشا من مرچی وتی نودربر ہم آئورتگ انت کہ آ چہ وتی زبان ءُ لبزانک ءَ آشنا بہ بنت۔ کماش سنگت رفیق ءَ چہ نودربراں تران کت ءُ گوشت کہ نودربر کتاب بہ وان انت ءُ اگاں آ وتی ماتی زبانانی کتاباں وان انت گڑا چریشی ءَ زبان زندگ مانیت ءُ آ وتی جذبات ءُ مارشتانی درانگازی ءَ شرّ تِر کن انت۔

اس خبر پر اپنی رائے کا اظہار کریں

اپنا تبصرہ بھیجیں