11

وتگڑیں لبزانکار ءُ بلوچ دود : عندلیب گچکی

نبشتانک

وت گڑیں لبزانکار ءُ بلوچ دود
عندلیب گچکی
بلوچ ءِ مستریں دود زالبول ءِعزت کنئگ ءُ عزت دئیگ اِنت ، بلوچ راجدپتر ( ہسٹری ) اِے گپ ءِ گواہ اِنت کہ بلوچ ہما مرد گشئگ بوتگ کہ وہدے آ یک مزن ءُ دیرگیں جنگے ءَ اگاں سوب مندی ءِ گڈی سیمسرءَ رسگ ءَ بوتگ بَلے یک زالبولے ءِ آہگ ءَ گوں آئی ءَ وتی جنگ وتی دژمنی یلہ داتگ ءُ سُہل کتگ ،
بلوچانی دود پہ زالبول ءِ شرپ ءَ سک باز آنت ، یک حسابے ءَ تو بگش کہ اِے پہ مردیناں یک اخلاقی قانودے کہ زالبولانی عزت ءَ بکن انت
بیا نوں کائیں وتی اصل بنگپ ءِ نیمگا
مرچی ءُ باندا۔ مرچی ءُ باندا ایوکا اناں بگندئے ساری ءَ اوں بوتگ بلے چو کہ من اے دور ءَ زندگی کنگاآں بازیں چیزے منی دیما پدّر بوآن انت دگہ یک گپے من ساری ءَ گیشّینگ لوٹاں کہ وہدءِ زالبول ءُ انّوگیں زالبول ءِ تہا باز فرق است بلے اے فرق آیانی دودانی نہ اِنت بلکیں ہر روچیگیں زند ءَ گوں سیادی داروکیں کار ءُ کسبانیگ انت، بلکن زند ءِ بازیں پڑے ءَ گوں ہمگرنچ اِنت ،
چو کہ ادب ، سیاست ، پدا پہ لاپ ءِ شوہاز ءَ تو بگش آ یک ٹیچرے ، یک انجینئرے ، ءُ دگہ ہم باز ۔ اے کسب ہم راستی ایوکا پہ لاپ ءِ شوہاز ءَ ناں بلکیں انسان ءِ وتی حب ءُ واہگ ءِ پیلوہی ءِ کشّگ انت گڑا اے حساب ءَ انوگیں زالبول گیشتر اڑ ءُ جنجالانی دیمپان بوت کنت یا بیت ۔ بلے بیا کہ مرچیگیں مردین آدم وت وَ ہرچی کنت یا آئی ءَ وتا وَ ہر وڑیں حق است بلے ہمے کار یا ہمے چیز ءَ کہ زالبولے ءِ نام کیت گڑا آ مہلوک ءِ سرحال جوڑ بیت (منی اے نبشتانک ءِ مقصد ہمک مردین اوں نہ اِنت چیا کہ منا وتا یک مہروانیں پتے است آ ہم مردینے۔ دو برات مہروانیں است کہ مردین اَنت ءُ منا یک ناکوزتک چُکّے است داؤد گچکی ( اے نبشتانک ءِ تہا اشانی زکر ءِ مقصد ایش انت کہ اشاں دائما منی ہمبراہ داری کتگ ءُ منا تسلہ داتگ ۔ منی عزت کتگ )۔ اشاں چہ ابید اوں دگہ مہروانیں منا وانوک یا بگش منی دلی دوست انت کہ آیانی سوَب ءَ من بازیں چیزے ءِ face کنئگ ءَ پد اوں نبشتہ کنئگ یلہ نہ کتگ ، من وا ہچبروتی قلم ایر نہ کتگ منا اگاں پبلشرانی کمک گون بوتیں گڑا انو من ہفت کتاب ءِ ہدابند اِتاں ءُ منی وانوکاں منی ہفت کتاب دست ءَ بوت ۔ بَلے بژنیگاں اے گپ ءَ کہ ہفت کتاب ءَ بل سے ئیں کتاباں چہ یک کاپی یے منی جند ءِ کرا اوں نیست ، وانوکاں وا گنتر گوں نیست ۔
منی نوکیں کتاب کہ چھاپ بوتگ آت کُلی ، اِے کتاب ءِ چھاپ بوئگ ءَ پیسر یا رند یا انگت من چینچو بزگی face کتگ ، اِے گپ ءَ من وت سہی اَنت ، آزادی ایوکا لوگ ءِ نہ اِنت۔ آزادی ایش اِنت کہ یک زالبولے اگاں تئ کش ءِ سیٹ ءَ نشتگ آ وتا پہنیام سرپد بہ بیت گڑا زالبول آزاد اِنت ۔
یک زالبولے اگاں سیاسی یا لبزانکی مراگشے ءِ واستہ دگہ جاگہے ءَ روت گڑا ہمے لہتیں لِٹّکیں مردین ( بچار لہتیں کاراں حراب کنت پدا نام درستانی تہا کیت) نندنت ءُ سوشل میڈیا ءَ گروپ جوڑ کننت چو کہ من اسلام آباد ء شتاں گڑا بازینے ءَ ہمے گپ جتگ ، زالبول وا دگہ اوں باز عندلیب پرچہ برتگ ئِے؟ بلَے راستی ایشنت کہ چہ من پیش اوں زاہدہ رئیسی ءُ مریم سیلمان ( چو کہ اودا اشاں وت گشت کہ ما اِے مراگشاں ساری ءَ آؤرتگ آنت ) برتگ اَنت ۔
بگندئے گوں من گیشتر جیڑہ اِے واستہ بیت کہ من ہمے زاناں کہ ہر حقے کہ چاگرد ءِ تہا مردین ءَ دئیگ بیت منا (زالبولے ءَ) اوں دئیگ بہ بیت ۔
ہئو یک گپے است کہ من سوشل میڈیا ء ہمے وڑ کارمرز کناں چو کہ یک مردینیں نبشتہ کارے ءُ اِے منی حیال ءَ منی حق اِنت پرے گپ ءَ کس ءَ حق مہ بیت کہ پہ اِے چیز ءَ کسے ءَ رد ءُ بد بکنت ،
وہدے منی کتاب کُلی چھاپ بوت ءُ آئی ءِ دیمدرائی بوت گڑا بازیں وانوکے ءَ گوں من رابطہ کت کہ مارا کتاب کجا رسیت ، گڑا ہمے کہ منی کتاب ءِ چھاپ کنوک اَتنت من اشاں گشت اشاں من ءَ پسو دات ،
اشاں گوں تو گپ ءِ بہانہ لوٹیت اِے ہچ وانوک نہ اَنت ، بَلے اِے اشانی وتی سوچ اِنت چیا کہ آیانی گشگ آت کہ اِے مارا چیا رابطہ نہ کننت ترا پرچا ؟
انّو ناگمان ءِکتاب ءِ واستہ وانوک ناگمان ءَ چِہ جست کننت یا پبلیشر ءَ ؟؟
اگاں منا گوں وانوکے رابطہ کنت گڑا اشی ءَ غلط مانا چے مکسد ءَ ؟؟
اِے لہتین ہمے مردم اَنت ادب ءِ تہا اشاں حاصیں نام نیست بَلے ہَو پہ دل چلّی ، دل کہری ، ٹارچر کنئگ ءَ اشاں حاصیں نامے است ،
یک مگسکے اگن گلاسے آپ ءَ بہ کپیت راستے کہ مگسک ءَ چہ آپ ءِ بستار گیشتر اِنت بلَے ہمے یکیں مگسک دل ءَ حراب کنت ، بائد اِنت کہ اِے وڑیں مگسک دارگ بہ بنت ، پہ عندلیب ءِ ہاترا اگاں اناں پہ وتی جند ءِ لوگ ءِ زالبول ءِ ہاترا کہ آ اوں ڈن ءَ اِنت ، آ آوں سیاست ءِ تہا اِنت ، آ اوں ادب ءِ پڑ ءَ اِنت
ادب بیت کہ سیاست ، یک زالبولے ءِ اناں یک انسانے ءِ یک نبشتہ کارے ءِ ہمراہ بو ، ہَو اگاں تو بلوچے ئے گڑا زالبولے ءِ ہمراداری بکن ۔
چو وَ من زاناں کہ یک قومے ءِ تہا وڑ وڑیں مردم بیت ءُ دنیا ءَ وہدے عظیم نبشتہ کار ژاں ژاک روسو نہ بکش اِت داں زندگ اَت آئی ءِ زند عزابے ءِ وڑا اَت گڑا منی وڑیں یک عام نبشتہ کارے کجا رکھیت ، بَلے گلہ ایش اِنت کہ اِے ہما راج اِنت کہ گشیت ما لجیں گہارانی ،ءُ راستے کہ اشی ءِ راجدپتر اِے گال ءِ ثبوت اِنت ،گڑا گلہ بیت گوں اِے وڑیں مردماں ، ہاں گلہ ہما وہد ءَ نہ بیت وہدے اِے وتی نام ءِ دیم ءَ بلوچ ءَ دور بکن اَنت ۔
امیت اِنت منی وانوک منی اِے نبشتانک ءَ انچو کہ من نبشتہ نہ کتگ چد ءُ گیش سرپد بنت ءُ وتی زالبولاں عزت دئینت آیانی ہمراداری ءَ کننت ءُ آیاں چہ اِے وڑیں رستراں رکھین آنت ۔

اس خبر پر اپنی رائے کا اظہار کریں

اپنا تبصرہ بھیجیں