منی نبشتانک: کوھستگ ءِ سفر ءُ عطاشاد ءِ وانگ ءِ بیمّ ءِ یک ٹکرے۔
شھاب اکرم بلوچ
دنیا ءِ لبزانک ءُ جیڑگ [ فلسفہ] ءُ ایندگہ علمانی سرا کتاب نبشتہ کنگ بیت کہ: اِے نبشتہ کار چون وانگ بہ بیت۔ فرنچ سائیکواینالسٹ لاکان گشیت جنین آدم ءَ را وجود نیست؟ من گوں دماغ ءَ اِناں بلکیں گوں پاداں فکر کناں۔I think with my feet. اِیشی ءَ نُوں کئے سرپد بیت۔ پمشکہ سلاوین جیڑوک [ فلسفی ] سلاوے ژیژک ءَ کتابے نبشتہ کت کہ How to read Lacan ۔ ہیرلڈ بلوم ءِ کتاب How to read and why ہم اے تک ءَ اہمیں کتابے کہ مردم چتور بوانیت۔ اِے درست وانگ ءِ سرا اَنت۔
ما عطاشاد ءُ منیر مومن ءُ مبارک قاضی ءِ سرا باز تاک سیاہ کتگ؛ علم البیان ءُ پوسٹ ماڈرن ازم ءِ پد ءَ ونتگ ءُ ٹپّاستگ اَنت بلئے منی دیما چشیں نبشتانکے نہ گوستگ کہ عطا شاد چتور وانگ بہ بیت؟ منیر مومن چتور وانگ بہ بیت؟ انچوکہ شاعری ازمے، وانگ ہم یک ازمے۔ دانکہ نقاد مہ زانت کہ من تخیلق کار ءَ چتور بواناں، آئی ءِ نگد توانگر نہ بیت بلکیں tenuous یا بےمعنا بیت۔ آ رد وارت۔ ہمے ھساب ءَ وانوک ہم رد وارت دانکہ آئی ءَ را وانگ ءِ ازم ءِ سرا دست رس مہ بیت ۔ من کسانیں جھدے کتگ ءُ دو سال پیسر عطا شاد ءِ وانگ ءِ سرا یک نبشتانکے نبشتہ کتگ ءُ منی جھد ہمیش اِنت دیما گیش نبشتہ بکناں کہ : ?How to read Atta Shad
۔۔۔۔
منی نبشتانک ءِ ٹکرے۔
کسانیں قصّہے کاراں پہ عطا شاد ءِ شعرانی وانگ ءِ سرا کہ وانوک ءَ را ہم Multi-Dimentional بوھگی اِنت۔
یک پیرزالے ءِ لوگ ءِ کِلِیت(چابی) گار اِتاں۔
آ اتکگ اَت شھر ءِ چوک ءِ سرا پَٹّگءَ اِتے۔
گڑا یکّے ءَ جُست گپت کہ بی بی چے پَٹّگائے؟
گشت ے کہ لوگ ءِ کِلِیت گار اَنت مئی پے، کِلیِتاں پَٹّگاؤں۔
گڑا آئی ءَ بی بی ءَ را پدا جُست کت کہ کلیت زاناں کُجا گار بوتگ اَنت؟
بی بی ءَ پسہ دات، “لوگ ءَ۔”
مرد حیران بوت۔۔۔۔۔
یکبرے پدا جُست ے کت کہ کِلِیت لوگ ءَ گار بوتگ اَنت ءُ تو کِلِیتاں چوک ءِ سرا پَٹّگائے؟
بی بی ءَ گشت ھَو، پرچاکہ لوگ ءَ تھار اِنت میم نہ بیت ادا روشنائی اِنت پمشکہ من اتکگوں اِدا پٹگاؤنے۔
۔۔۔۔۔۔۔۔
عطا ءِ شعرانی وانگ ءِ وڈ( method) مَٹ کَنگی اِنت، عطا ءِ وَانگ ءُ آئی ءِ شعرانی پہمگ ءِ اولی شرت ہمیش اِنت کہ مارا بلوچ ءِ کِرّا شعر ءِ کد ءُ مکام پولگی اِنت ءُ عھدی شاعری سرجم ءَ نہ ایوک وانگی بلکیں پَرّیسگی اِنت ہم۔
دگہ یکّ گپے کہ باز مردم ہمے سرپد بیت شاعری گوں لبزاں نہ بیت بلکیں خیال شعر ءَ را جوڈ کَنت گڑا من اِدا الہامی کتاب بائیبل ءِ اولی رِد ءِ درور ءَ دیاں کہ لبز چینکدر اہم اِنت پہ ہرشے ءَ:
In the beginning was the Word, and the Word was with God, and the Word was God
عطا شاد ءِ کِرّا لبز ہمینچو اِہم اِنت کہ عطا شاد وتی شاعری ءِ توکا بلوچی زبان ءِ ہرسئیں گالوارانی لبزاں جاہ دنت، ایشی ءِ دو نپ اَنت۔
یکّے وَ ہرسئیں گالوارانی نزیکّی گیش بیت ءُ دومی ہمے لبز لس( عام) بنت پہ آھندگ ءِ ہرسئیں گالوارانی شاعراں۔ چشکہ لبز ھتم اِنت کہ بھار ءَ گُشنت بلئے مرچی باندا مکران ءِ شاعر ایشی ءَ باز وش ءُ جوان کارمرز کنگءَ اَنت۔
