204

من اُوں وانگ لوٹاں : نبشتانک: ظفر رند

من اُوں وانگ لوٹاں

نبشتانک: ظفر رند

زانتکار ءِ ئے لیکہ انت کہ اگاں یک قوم ءِ دیمروئی لوٹ ایت گُڈا آ وتی زالبول ءَ وانندہ بکنت۔
دنیا ءِ تہا ہر ملک ءِ ریاست ءِ سرا فرض انت کہ آ وتی قوم ءِ لس مردم ءَ تعلیم مفت ءَ بدنت اُو آئی بنیادی درستیں ضرورتاں پورا بکنت۔ بلے بد قسمتی ءَ ما چہ ای درستیں چیز ءَ پشت کپتگ انت اُو ما یک انچیں بدھالیں چاگرد ءِ تہا زند گوازینگ ءَ انت کہ مے واستا زندگ بوئگ ہم مصیبت جوڈ بوتگ۔مروچی بیست و یکمی کرنءَ دنیا ءِ ای دگہ قوماں انچو دیمروئی کُتگ کہ آ چہ وتی ملک ءِ حکمران ءَ جدیدیں ٹیکنالوجی لوٹ کنگ ءَ انت، بلے ای عہدءَ ہم بلوچ نودربر چہ وتی بنیادی سہولتاں چہ زبہر انت۔چہ بلوچستان ءِ در اتکگیں مال ءُ مڈیآں ای دگہ بازیں قوم سیر لاپ اَنت ءُ وش حالیں زند گوازینگ ءَ انت بلے بلوچستان ءِ نندوکیں لس مہلوک پہ چُنڈ ءِ نان ءُ تعلیمی ادارہ ءَ چہ ہم زبہر انت۔ما چہ یک انچیں راجی ءَ چہ تعلق دار انت کہ آئی شمار دنیا ءِ سیر ترین ملکانی تہا بیت اُو آئی مال ءُ مڈّیانی ہبر دنیا ءِ سوپر پاور ملکانی تہا ڈسکس بنت بلے ادے نندوکیں مردم انچو بے وس انت کہ وتی یونیورسٹی فیس ءَ ہم دات نکن انت۔
چوناہا بلوچ ہر حوالہءَ بزّگ ءُ لاچار انت۔ آ چہ وتی درستیں بنیادی سہولت ءَ محروم انت بلے مے چاگرد ءِ تہا بلوچ زالبول گیشتر اثر انداز انت ءُ پُشت ءَ کپتگ انت۔ آئی سبب ہمیش انت کہ مے چاگرد ءِ تہا زالبول برابری ئے نگاہءَ چارگ نہ بیت اُو استیں اہد ءَ ہم آ وتی بنیادی لوٹانی واستہ توار چیست کُت نہ کنت۔
کیچ بلوچستان ءِ دومی مستریں شہر انت اُو چہ کیچ ءَ ہمک الیکشن ءَ مزنیں کساس ءِ نمائندہ ماں پارلیمنٹءَ سر بنت ءُ بلوچءِ نمائندگی کنگ ءِ دعوی کن انت اُو ڈیولپمنٹءِ واستا مزنیں کساس ءَ زر ءُ مال ءِ بجٹ پاس کن انت۔ اُو علاقہ ئے وشحالی دعویٰ کن انت بلے راستی ہمش انت کہ ادا بس لہتیں مردم سیر لاپ بوہگ ءَ انت اُو لس مہلوک، درتہ پُچ ءُ بزگ ءُ لاچاریں بلوچ ءِ زند ءِ تہا ہیچ وڈیں پرک پیداک نہ انت۔
تربت یونیورسٹی ءِ تہا یک بلوچ زالبول ءِ کہ آئی ہزار بزگی ءُ لاچاری شُد لاپی برداشت کُتگ پہ وانگ زانگ ءِ ہاتر ءَ ای زالبول Mphil نودربر ءِ اُوں فیس دات کُت نکنگ ءِ سوب ءَ وانگ اُوشتءِ آماچ بوہگ ءَ انت۔ ایشی واہشت انت کہ من بواناں اُو وتی ڈگری ءَ پورا بکناں بلے ای بے دست رس انت۔ ای گوں وتی قوم ءِ سروک ءُ سربراہ دستبندی کنگ ءَ انت کہ منا کسانیں تعاون بکن اِت دانکہ من وتی وانگءَ دیم ءَ بُرت بکناں بلے انگتہ ہیچ وڈیں تعاون کنگ نہ بوتگ۔
مے چاگرد ءِ تہا چونہاں باز کم زالبول ءَ وانگ ءُ زانگءِ آزادی رسیت۔ اگاں یکی ءَ رسیت ہم آ ہزار مشکلات وجہ ءَ چہ دیم ءَ وانت نہ کنت۔ من چہ وتی راجءِ سروک ءُ سربراہاں دستبندی کناں کہ ای بانک ءِ وانگ پہ 45ہزار کلدار ءِ واستہ اُوشتءِ آماچ بوتگ۔ ایشی ءَ کمک بکن ات دانکہ ای نودربر وتی وانگ ءَ دیما بُرت بہ کنت.

اس خبر پر اپنی رائے کا اظہار کریں

اپنا تبصرہ بھیجیں