8

منی دِل وشّ اِنت کہ بی ایم پی سی بلوچی میوزک ءِ پہازگ ءُ دیمرئی ءِ ھاتر ءَ یک ستاکرزیں کارے کنگ ءَ اِنت، حمزہ جعفری

کراچی(گدروشیاپوائنٹ)چہ بلوچی میوزک پروموٹرز سوسائٹی ءِ نیمگءَ گُلزار گچکی، زاھر حسین، وحید نُور ءُ اِسحاق خاموش ءَ نیشنل اکیڈمی آف پرفارمنگ آرٹس (NAPA)ءِ زیمری بہرگ ءِ کماش (Head of Music) حمزہ جعفری ءَ گوں گِند ءُ نندے کُت۔سوسائٹی ءَ حمزہ جعفری ءَ پہ بلوچی زیمر ءِ دیمرئی، پہازگ ، گُشندہ ءُ اِزمکارانی شرپ ءَ مراگشانی ٹہینگ، آھانی مالی کُمک ءُ مدت، بلوچی زیمر ءِ تک ءَ کتابانی چاپ ءُ شِنگ کنگ ءُ بلوچی میوزک پروموٹرز سوسائٹی ءِ کار ءُ کِردانی باروا سرجم ءَ سرپدی دات۔ حمزہ جعفری ءَ بلوچی میوزک پروموٹرز سوسائٹی ءِ کِرد ءَ را ساڑات ءُ گُشت کہ منی دِل وشّ اِنت کہ سوسائٹی بلوچی میوزک ءِ پہازگ ءُ دیمرئی ءِ ھاتر ءَ یک ستاکرزیں کارے کنگ ءَ اِنت۔ اے گِند ءُ نند ءِبندءُبست بلوچی ءُ اُردو ءِ جْوانیں شاعر ظہیر ظرفءَکتگ اَت۔سوسائٹیءَ گوں ناپا ءِزیمری بہرگءِسروک حمزہ جعفری ءَ گُشت کہ مئے ادارہ ءِ واھگ اِنت کہ ما لیاری ءُ آئی ءِ کش ءُ کِرّ ءِ دمگاں سازءُ زیمر ءَ گوں ھُب داروکیں بُودِشتاں دربگیج ایں ءُ آھاں اسکالرشپ بدئیں کہ ڈپلومہ ءِ ھَواری ءَ ایشی ءِ مُدّت سئے سال ئیگ اِنت۔ سوسائٹی ءَ گُشت کہ سوسائٹی ناں ایوک ءَ لیاری بلکیں سرجمیں بلوچستان ءَ گوں ساز ءُ زیمرءَ ھُبداریں بُودِشتی ئیں۔ ورناھانی در جنگ ءُ شوھازگ ءَ ناپا ٹیلنٹ (Talent) ءِ مدت ءُ کُمک ءَ ساڑی اِنت۔سوسائٹی ءَ اے واھگ درشان کُت کہ ناپا ءِ وڑیں مزنیں ادارگے ءِ تہا سروز ءِ کلاس بندات کنگ بہ بنت ، آئی ءَگُشت کہ زُوتّ ایشی ءِ یک کار رھبندے گیشّین ایں ءُ چہ سوسائٹی ءِ وسیلگ ءَگوں بلوچ اِزمکاراں(زیمر کاراں) گند ءُ نند ءَ پد یک سلیبسے ٹہین ایں ءُ اے کار ءَ بندات کن ایں۔سوسائٹی ءَ بلوچی ءِ زیمر ءِ بارو ءَ چاپ ءُ شنگ بُوتگیں کتابانی سیٹ یے دات کہ واجہ حمزہ جعفری ءَ دِل سدّکی دات کہ اے کتاب ناپا ءِ کتابجاہ ءِ تہا ایر کنگ بنت۔ گُڈسر ءَ حمزہ جعفری ءَ سوسائٹی ءَ را ناپا ءِ آرٹ گیلری ءِ ترّ ءُ تاب کنائینت۔

اس خبر پر اپنی رائے کا اظہار کریں

اپنا تبصرہ بھیجیں