17

تربت،بلوچستان اکیڈمی ءِ ماہینی لبزانکی دیوان ماں اکیڈمی ءِ بنجاہی کارگس ءَ برجم دارگ بوت

تربت(گدروشیا پوائنٹ) بلوچستان اکیڈمی تربتءِ پریس ریلیز ءِ ردا مروچی 01/10/2023 بلوچستان اکیڈمی ءِ ماہینی لبزانکی دیوان ماں اکیڈمی ءِ بنجاہی کارگس ءَ برجم دارگ بوت۔اے دیوان بلوچی شاعر مبارک قاضی ءِ نام ءَ ات۔اے دیوان ءِ پاگواجہ ڈاکٹر غفور شاد ات، جارچین عابد علیم ات ءُ ہاسیں مہمان غنی پرواز ءُ واجہ یوسف عزیز گچکی ات انت۔
اے دیوان شاعری ءُ ردانکی بہر ءَ ات۔
ردانکی بہر ءِ سرجمیں نبشتانک مبارک قاضی ءِ بابت اتاں۔
مقبول ناصر ءَ تران کنان ءَ گشت مبارک قاضی بلوچ ءِ subconsciousness انت۔قاضی کدی کدی ملا فاضل ءِ وڈا شئیر ءِ گڈ سرا وتی پنتاں ازمی رنگ ءَ وتی راج ءَ سر کنت۔
فضل بلوچ ءَ تران کنان ءَ گشت قاضی nonconformist شاعرے۔قاضی ءَ ازمی رنگ ءَ ہر زوراکی ءِ بابت ءَ آواز چست کتگ۔
عارف عزیز ءِ گشگ ات قاضی ہر ہلک و کوچگ ءِ شاعر انت۔ قاضی ءَ دیوان ءَگپ گپ ءِ تہا شئیر نبشتہ کتگ۔
بلوچستان اکیڈمی ءِ چیئرمین ڈاکٹر غفور شاد ءَ تران کنان ءَ گشت کہ قاضی ءَ وتی توار لوگ لوگ ءَ، کنڈ کنڈ ءَ سر کتگ۔ہر پیر واناہ ،گوانڈو ءَ زانت مبارک قاضی شاعرے۔شاد ءَ تران کنان ءَ گشت بلوچی شاعری ءَ وت یک ربیتے است۔شئیر تہنا کتابی فارمولایانی حساب ءَ چارگ مہ بیت۔بلکیں ہمے شئیری ربیت اوں زانگی انت۔ہر شئیر ءَ وت ءَ تاریکے است ، تہزیبے است، ہر شئیر ءِ پرریچگ ہم ارزان نہ انت۔قاضی ہر بلوچ ءِ شاعر انت۔ آئی ءِ گورا رسانک ءِ جتائیں ھنرے بوتگ،ہرکس قاضی ءَ پہمیت ۔
یوسف عزیز ءَ گشت کہ قاضی ءَ درد نبشتہ کتگ ۔ہما قاضی ءِ درشانداب انچوش ات کہ قاضی ءَ لبزانی حاجت نیست ات، بلکیں لبز وت تچان اتاں کہ مارا نبشتہ بکن۔
گڈسرا پروپیسر غنی پرواز ءَ تران کت کہ قاضی ءَ جتا جتائیں ٹیکنیکانی سرا شئیر گشتگ۔شئیرانی تہا وتن دوستی، گلزمیں ءِ دوستی، انسان دوستی گندگ بیت۔
شاعری بہر ءَ عارف عزیز واجہ منوار علی رٹہ ءُ ایندگہ ورناہاں شئیر ونت انت۔
اے دیوان ءَ بلوچستان اکیڈمی ءِ لس کارگشاد شگراللہ ، مقبول ناصر ، سغیر احمد، عبید شاد، جمال منظور، جمال پیر محمد ءُ راشد حسرت ساڑی ات انت۔
بلوچستان اکیڈمی ءِ کماش ڈاکٹر غفورشاد ءَ گڈسرا دیوان ءِ منت گپت ءُ دیوان ءِ آسری ءِ جار جت۔

اس خبر پر اپنی رائے کا اظہار کریں

اپنا تبصرہ بھیجیں