1

اسلام آباد (گدروشیا پوائنٹ): ملک بھر میں خشک سالی کا خدشہ، سندھ کے مختلف اضلاع کے لیے ہائی الرٹ جاری

نیشنل ایمرجنسی آپریشن سینٹر (NEOC) نے ملک بھر میں خشک سالی کی بگڑتی ہوئی صورتحال کے پیش نظر سندھ کے مختلف اضلاع کے لیے ہائی الرٹ جاری کر دیا ہے۔ حکام کے مطابق موسمیاتی تبدیلیوں اور بارشوں میں غیر معمولی کمی کے باعث زرعی اور آبی ذخائر پر شدید دباؤ بڑھ رہا ہے، جس سے غذائی تحفظ کو خطرات لاحق ہو سکتے ہیں۔

این ای او سی کی جانب سے جاری کردہ اعلامیے میں کہا گیا ہے کہ ماہرین کی ٹیمیں صورتحال کی مسلسل نگرانی کر رہی ہیں اور زمینی حقائق کا جائزہ لینے کے لیے ڈیٹا اکٹھا کیا جا رہا ہے۔ متعلقہ ضلعی انتظامیہ کو ہدایت کی گئی ہے کہ وہ ہنگامی بنیادوں پر پانی کے متبادل ذرائع اور قحط زدہ علاقوں میں امدادی سرگرمیوں کے لیے تیاری مکمل رکھیں۔

ماہرینِ موسمیات نے خبردار کیا ہے کہ اگر آنے والے دنوں میں بارشوں کا سلسلہ شروع نہ ہوا تو خشک سالی کی شدت میں مزید اضافہ ہو سکتا ہے۔ حکومت کی جانب سے متاثرہ علاقوں میں پانی کی فراہمی کو یقینی بنانے اور مویشیوں کے تحفظ کے لیے خصوصی اقدامات پر غور کیا جا رہا ہے تاکہ انسانی اور معاشی نقصانات کو کم سے کم کیا جا سکے۔

اس خبر پر اپنی رائے کا اظہار کریں