قصور میں راہ چلتی خواتین کو ہراساں کرنے کا شرمناک واقعہ پیش آیا ہے، جس کی ویڈیو سوشل میڈیا پر تیزی سے وائرل ہو گئی۔ ویڈیو میں دیکھا جا سکتا ہے کہ ایک ملزم سڑک پر چلتی خواتین کو غیر اخلاقی حرکات کے ذریعے ہراساں کر رہا ہے، جس پر عوامی حلقوں میں شدید غم و غصے کی لہر دوڑ گئی۔
واقعے کا نوٹس لیتے ہوئے ڈی پی او قصور نے فوری کارروائی کے احکامات جاری کیے۔ پولیس کی جانب سے جدید ٹیکنالوجی اور مقامی ذرائع کی مدد سے ملزم کی شناخت کی گئی اور اسے گرفتار کر لیا گیا ہے۔ حکام کا کہنا ہے کہ ملزم کو قانون کے کٹہرے میں لایا جائے گا تاکہ اسے قرار واقعی سزا دی جا سکے۔
ڈی پی او قصور نے اس عزم کا اعادہ کیا ہے کہ خواتین کی عزت و وقار کا تحفظ اولین ترجیح ہے اور کسی کو بھی عوامی مقامات پر ہراساں کرنے کی اجازت نہیں دی جائے گی۔ پولیس نے عوام سے اپیل کی ہے کہ وہ ایسے واقعات کی فوری اطلاع دیں تاکہ معاشرتی بگاڑ پیدا کرنے والے عناصر کے خلاف بروقت کارروائی ممکن ہو سکے۔
