1

کراچی (گدروشیا پوائنٹ): کورنگی زمان پارک کے قریب سے 4 بچوں کے باپ کی تشدد زدہ لاش برآمد

کراچی کے علاقے کورنگی ڈیڑھ نمبر میں زمان پارک کے قریب سے ایک شخص کی تشدد زدہ لاش ملی ہے، جس کی شناخت چار بچوں کے باپ کے طور پر ہوئی ہے۔ مقامی پولیس کے مطابق مقتول کو نامعلوم افراد نے اغوا کے بعد انتہائی بے دردی سے قتل کیا اور لاش کو ویرانے میں پھینک کر فرار ہو گئے۔

ابتدائی طبی معائنے اور جائے وقوعہ سے ملنے والے شواہد سے معلوم ہوتا ہے کہ مقتول کے سر، آنکھوں اور جسم کے دیگر نازک حصوں پر بھاری اور دھار دار آلات سے شدید تشدد کیا گیا تھا۔ پولیس نے لاش کو تحویل میں لے کر پوسٹ مارٹم کے لیے جناح ہسپتال منتقل کر دیا ہے تاکہ موت کی حتمی وجوہات کا تعین کیا جا سکے۔

پولیس حکام نے واقعے کا مقدمہ درج کر کے تفتیش شروع کر دی ہے۔ جائے وقوعہ کے اطراف میں موجود سی سی ٹی وی کیمروں کی فوٹیج حاصل کی جا رہی ہے تاکہ ملزمان کی شناخت اور گرفتاری کو یقینی بنایا جا سکے۔ مقتول کے لواحقین نے حکام سے مطالبہ کیا ہے کہ سفاک قاتلوں کو جلد از جلد کیفر کردار تک پہنچایا جائے۔

اس خبر پر اپنی رائے کا اظہار کریں