کراچی کے علاقے گلشن معمار میں ڈکیتی کی ایک بڑی واردات پیش آئی ہے، جہاں مسلح ملزمان نے اسلحے کے زور پر پیٹرول پمپ کے ملازم کو یرغمال بنا کر 40 لاکھ روپے کی خطیر رقم لوٹ لی۔ واردات کے بعد ملزمان باآسانی موقع سے فرار ہونے میں کامیاب ہو گئے۔
واقعے کی اطلاع ملتے ہی مقامی پولیس اور تفتیشی حکام جائے وقوعہ پر پہنچ گئے اور شواہد اکٹھے کیے۔ ہیڈ محرر ملک طفیل کے مطابق، متاثرہ پیٹرول پمپ انتظامیہ کی مدعیت میں نامعلوم ملزمان کے خلاف مقدمہ درج کر لیا گیا ہے اور سی سی ٹی وی فوٹیج کی مدد سے ملزمان کی شناخت کا عمل شروع کر دیا گیا ہے۔
پولیس حکام کا کہنا ہے کہ ابتدائی تحقیقات کے مطابق یہ واردات منصوبہ بندی کا نتیجہ معلوم ہوتی ہے۔ علاقے میں بڑھتی ہوئی اسٹریٹ کرائم کی وارداتوں پر شہریوں میں شدید تشویش پائی جاتی ہے، جبکہ پولیس نے ملزمان کی گرفتاری کے لیے شہر کے داخلی و خارجی راستوں پر ناکہ بندی سخت کر دی ہے۔
