افغان طالبان کی حکومت نے صوبہ قندھار میں تمام مقامی ریڈیو اسٹیشنوں کو کرکٹ سے متعلق خبریں، خصوصی پروگرام اور میچوں کی براہِ راست کوریج نشر کرنے سے سختی سے روک دیا ہے۔ بین الاقوامی خبر رساں اداروں اور مقامی میڈیا رپورٹس کے مطابق، طالبان کے محکمہ اطلاعات و ثقافت نے ریڈیو اسٹیشنوں کے منتظمین کو ٹیلی فون کالز کے ذریعے اس فیصلے سے آگاہ کیا ہے، تاہم اس پابندی کی کوئی باضابطہ وجہ یا وضاحت تاحال سامنے نہیں آئی ہے۔
قندھار کے مقامی ریڈیو اسٹیشنوں کے سربراہان نے اس پیش رفت کی تصدیق کرتے ہوئے بتایا ہے کہ انہیں کرکٹ سے متعلق ہر قسم کا مواد نشر کرنے سے منع کیا گیا ہے۔ یہ پابندی ایسے وقت میں سامنے آئی ہے جب افغانستان کی قومی کرکٹ ٹیم شارجہ میں زمبابوے کے خلاف ٹیسٹ سیریز میں مصروف ہے اور مقامی سطح پر کرکٹ کے شائقین کی تعداد میں تیزی سے اضافہ ہو رہا تھا۔
واضح رہے کہ افغانستان میں کرکٹ سب سے مقبول کھیل کے طور پر ابھرا ہے اور ماضی میں طالبان قیادت اس کھیل کی سرپرستی کرتی رہی ہے۔ یہاں تک کہ اگست میں طالبان کے اقتدار کی سالگرہ کے موقع پر بھی کرکٹ میچوں کا انعقاد کیا گیا تھا۔ قندھار، جو کہ طالبان کے سپریم کمانڈر کا گڑھ سمجھا جاتا ہے، وہاں اس پابندی کو مبصرین کی جانب سے ایک غیر متوقع اقدام قرار دیا جا رہا ہے۔










