1

اسلام آباد (گدروشیا پوائنٹ): برطانیہ ورک ویزا کے نام پر 50 لاکھ لوٹنے والے گینگ کے 23 ارکان گرفتار

وفاقی دارالحکومت اسلام آباد میں این سی سی آئی اے (NCCIA) نے ایک بڑی کارروائی کرتے ہوئے آن لائن مالی فراڈ میں ملوث ایک منظم گروہ کو بے نقاب کر دیا ہے۔ حکام کے مطابق، یہ گروہ برطانیہ کے ورک ویزا کے حصول کے نام پر سادہ لوح شہریوں کو اپنا نشانہ بناتا تھا اور اب تک لاکھوں روپے کی خطیر رقم بٹور چکا ہے۔

کارروائی کے دوران پولیس نے گروہ کے 23 ارکان کو حراست میں لیا ہے، جن میں خواتین بھی شامل ہیں۔ ابتدائی تفتیش کے مطابق، ملزمان نے ایک شہری سے برطانیہ ورک ویزا دلوانے کا جھانسہ دے کر 50 لاکھ روپے ہتھیا لیے تھے۔ ملزمان جدید ٹیکنالوجی کا استعمال کرتے ہوئے شہریوں کو جعلی دستاویزات فراہم کرتے تھے تاکہ انہیں اپنے جال میں پھنسایا جا سکے۔

پولیس حکام کا کہنا ہے کہ گرفتار ملزمان سے تفتیش کا عمل جاری ہے جس سے مزید اہم انکشافات متوقع ہیں۔ گروہ کے دیگر سہولت کاروں کی گرفتاری کے لیے چھاپے مارے جا رہے ہیں۔ عوام سے اپیل کی گئی ہے کہ وہ ویزا کے نام پر کسی بھی مشکوک آن لائن پیشکش پر رقوم کی منتقلی سے گریز کریں اور صرف سرکاری اور تصدیق شدہ ذرائع پر انحصار کریں۔

اس خبر پر اپنی رائے کا اظہار کریں