کراچی میں موسم سرما کے اثرات نمودار ہونا شروع ہو گئے ہیں، جس کے بعد صبح کے اوقات میں خنکی میں اضافہ ریکارڈ کیا گیا ہے۔ محکمہ موسمیات کے مطابق شہر میں سردی کی لہر کا باقاعدہ آغاز ہو چکا ہے، جس سے شہریوں نے گرم ملبوسات کا استعمال شروع کر دیا ہے۔
محکمہ موسمیات نے اپنی رپورٹ میں پیش گوئی کی ہے کہ رواں موسم سرما کے دوران کراچی میں سردی کے معتدل اسپیلز متوقع ہیں۔ ان موسمیاتی تبدیلیوں کے دوران شہر میں وقفے وقفے سے بارشوں کا امکان بھی ظاہر کیا گیا ہے، جو درجہ حرارت میں مزید گراوٹ کا باعث بن سکتی ہیں۔
ماہرینِ موسمیات کا کہنا ہے کہ کراچی کا موسم بتدریج سرد ہو رہا ہے اور آئندہ دنوں میں رات کے درجہ حرارت میں مزید کمی متوقع ہے۔ محکمہ موسمیات نے شہریوں کو موسمی تبدیلیوں کے پیشِ نظر احتیاطی تدابیر اختیار کرنے کی ہدایت کی ہے۔










