جنوبی پنجاب کے ضلع راجن پور کی تحصیل روجھان کے نواحی علاقوں میں طویل عرصے بعد نایاب نسل کے گدھوں (Vultures) کی واپسی ہوئی ہے، جس سے مقامی ماحولیاتی ماہرین میں خوشی کی لہر دوڑ گئی ہے۔ مقامی ذرائع کے مطابق علاقے میں ایک ساتھ 9 نایاب گدھوں کو دیکھا گیا ہے، جو اس خطے کے حیاتیاتی تنوع کے لیے ایک مثبت پیش رفت قرار دی جا رہی ہے۔
ماہرینِ ماحولیات کا کہنا ہے کہ گدھ قدرت کے صفائی کرنے والے نظام کا اہم حصہ ہیں، تاہم گزشتہ چند دہائیوں کے دوران خوراک کی کمی اور رہائشی علاقوں میں مداخلت کے باعث یہ پرندے معدومیت کے خطرے سے دوچار ہو گئے تھے۔ روجھان کے سرحدی علاقوں میں ان کا دوبارہ نمودار ہونا اس بات کی نشاندہی کرتا ہے کہ یہاں کا قدرتی ماحول ان کی افزائش کے لیے دوبارہ سازگار ہو رہا ہے۔
مقامی انتظامیہ اور وائلڈ لائف ڈیپارٹمنٹ سے مطالبہ کیا گیا ہے کہ ان نایاب پرندوں کے تحفظ کے لیے فوری اقدامات کیے جائیں۔ ماہرین نے مقامی آبادی پر زور دیا ہے کہ ان پرندوں کو کسی قسم کا نقصان نہ پہنچایا جائے اور ان کے قدرتی مسکن کو محفوظ رکھنے میں تعاون کیا جائے تاکہ ان کی آبادی میں مزید اضافہ ممکن ہو سکے۔
