نیشنل الیکٹرک پاور ریگولیٹری اتھارٹی (نیپرا) نے سہ ماہی ایڈجسٹمنٹ کی مد میں بجلی کی قیمتوں میں اضافے سے متعلق سماعت مکمل کر لی ہے۔ حکام کے مطابق بجلی کی قیمتوں میں ایک روپیہ 34 پیسے فی یونٹ اضافے کی تجویز دی گئی ہے، جس کا حتمی فیصلہ محفوظ کر لیا گیا ہے۔
دورانِ سماعت نیپرا حکام نے بجلی کی تقسیم کار کمپنیوں کی جانب سے وصولیوں اور نقصانات کے اعداد و شمار کا جائزہ لیا۔ ذرائع کا کہنا ہے کہ یہ اضافہ سہ ماہی ایڈجسٹمنٹ کے تحت کیا جا رہا ہے، جس کا اطلاق ملک بھر کے تمام صارفین پر ہوگا۔ نیپرا کی جانب سے باضابطہ نوٹیفکیشن جاری ہونے کے بعد اضافے کا اطلاق عمل میں لایا جائے گا۔
واضح رہے کہ بجلی کی قیمتوں میں حالیہ اضافے سے مہنگائی کی چکی میں پسے ہوئے عوام پر مزید بوجھ پڑے گا۔ ماہرینِ معاشیات کے مطابق ایندھن کی قیمتوں میں اتار چڑھاؤ اور گردشی قرضوں کے باعث بجلی کی قیمتوں میں تسلسل کے ساتھ اضافہ صارفین کے لیے تشویش کا باعث بنا ہوا ہے۔










